Qurilayotgan uylarning har bir podyezdiga videokuzatuv kameralari o‘rnatish, “aqlli” migratsiya punktlarini tashkil etish, infarkt va insultga qarshi kurash bo‘yicha Milliy dasturni joriy etish, shuningdek arxiv xizmatlarini ko‘rsatishda ayrim hujjatlarni talab qilishni bekor qilish — ushbu va boshqa yangiliklar 1 mayda

2026 yil 1 maydan boshlab milliy qonunchilikda quyidagi o‘zgarishlar kuchga kiradi:

1. Har qanday darajadagi standartlarni qo‘llash ixtiyoriy tus oladi. Respublika hududida xalqaro (mintaqaviy, xorijiy) standartlarni qabul qilishning xalqaro amaliyoti joriy etiladi, standartlarning rasmiy ro‘yxati milliy standartlar darajasida shakllantiriladi.

2. Yangi qurilayotgan ko‘p qavatli uylar loyihalarida har bir podyezd, liftlar va atrof hududda kuzatuv kameralari, shuningdek kirish eshiklarida domofon tizimlarini o‘rnatish nazarda tutiladi.

3. Umra safarini amalga oshirish «Haj va Umra» yagona portalida majburiy ro‘yxatdan o‘tish orqali amalga oshiriladi.

4. Taҗriba tartibida Toshkent, Samarqand va Farg‘ona viloyatlari hamda Qoraqalpog‘iston Respublikasining ayrim tuman (shahar)larida ichki ishlar organlarining migratsiya va personalizatsiya bo‘linmalarida sunʼiy intellekt texnologiyalari asosida ishlaydigan, o‘z-o‘ziga xizmat ko‘rsatish imkoniyatiga ega “aqlli” migratsiya punktlari (Smart migration stations) tashkil etiladi.

5. Xalqaro dasturlar («Stent for Life» va «Action Plan for Stroke») asosida ishlab chiqilgan infarkt va insultga qarshi kurash bo‘yicha Milliy dastur joriy etiladi.

6. Tovarlarni respublika hududiga olib kirishda davriy deklaratsiyalash orqali har bir partiya uchun bojxona to‘lovlarini alohida to‘lash imkoniyati yaratiladi.

7. Tashqi savdo bilan bog‘liq notarif tartib-taomillarni belgilashning shaffof mexanizmi joriy etiladi: — taqiq va cheklovlar reyestri yuritilib, ular kamida 3 oy oldin «Yagona darcha» bojxona axborot tizimida eʼlon qilinadi; — vakolatli davlat organlari va ularning quyi tashkilotlari tomonidan ko‘rsatiladigan xizmatlar uchun yig‘imlar (to‘lovlar) miqdori va hisob-kitobi «Yagona darcha» tizimida ochiq eʼlon qilinadi.

8. Arxiv xizmatlarini ko‘rsatishda quyidagi hujjatlarni talab qilish bekor qilinadi: — arxiv hujjatlarini tartibga solish bo‘yicha malaka attestatsiyasida tegishli rahbarning tavsiya xati; — mavzuli so‘rovlar bo‘yicha maʼlumotnoma berishda so‘ralayotgan hujjat nusxasi; — arxiv hujjatlarini vaqtincha xorijga olib chiqish uchun ruxsat berishda ularning o‘tkazilishiga oid hujjatlar; — tijorat tashkiloti hujjatlari davlat arxiviga topshirilganini tasdiqlovchi maʼlumotnoma (bunda davlat ro‘yxatidan o‘tkazuvchi organlar ushbu maʼlumotni mustaqil ravishda arxiv axborot tizimi orqali oladi).

9. Nogironlikni belgilash (bolalikdan, I va II guruh) bo‘yicha davlat xizmatida fuqarolarni imtiyozli davolanish uchun tibbiyot muassasalariga yo‘naltirish va elektron navbatga qo‘yish kompozit shaklda amalga oshiriladi.

10. Barcha litsenziya, ruxsatnoma va xabardor qilish tartib-taomillari «Litsenziyalash, ruxsat berish va xabardor qilish tartib-taomillari to‘g‘risida»gi qonun bilan tartibga solinadi hamda faqat “Litsenziya” axborot tizimi yoki YAIDXP orqali amalga oshiriladi (Markaziy bank va Milliy istiqbolli loyihalar agentligi vakolatiga kiruvchi tartib-taomillar bundan mustasno).