"Ijtimoiy reyestr"ga kiritilgan oilalarning 14 yoshdan 30 yoshgacha bo‘lgan aʼzolari uchun to‘lov-kontrakt xarajatlarini qisman qoplash bo‘yicha yangi imkoniyat yaratildi.

Endilikda ushbu toifadagi fuqarolar “Yoshlar daftari” jamg‘armasi hisobidan to‘lov-kontrakt summasining bir qismini qoplash uchun onlayn tarzda my.gov.uz platformasi orqali ariza topshirishlari mumkin. 

Mazkur yordam faqat kunduzgi taʼlim shaklida kontrakt asosida tahsil olayotgan talabalar va o‘quvchilarga tatbiq etiladi. Jumladan, professional taʼlim muassasalari o‘quvchilari, davlat va nodavlat oliy taʼlim tashkilotlari talabalari hamda O‘zbekistondagi xorijiy oliy taʼlim muassasalari va ularning filiallarida bakalavriat yoki magistratura bosqichida o‘qiyotgan talabalar ushbu imkoniyatdan foydalanishi mumkin.

Belgilangan tartibga ko‘ra, yordam miqdori to‘lov-kontrakt summasining 50 foizigacha, biroq bazaviy hisoblash miqdorining 50 baravaridan oshmagan miqdorda qoplab beriladi. Arizalar 8 ish kuni ichida ko‘rib chiqiladi.

Ushbu yengillik quyidagi holatlarga tatbiq etilmaydi: ikkinchi va undan keyingi mutaxassislikda o‘qiyotganlar, sirtqi, kechki yoki masofaviy taʼlim shaklidagi talabalar, qo‘shma taʼlim dasturlari ishtirokchilari hamda “super-kontrakt” asosida tahsil olayotganlar.

Jarayon tartibi bo‘yicha talabgorlar my.gov.uz orqali ariza yuboradi, murojaatlar “Mahalla yettiligi” tomonidan ko‘rib chiqiladi. Ijobiy qaror qabul qilingach, mablag‘ ijtimoiy shartnoma shartlarining bajarilish darajasiga qarab taʼlim muassasasining bank hisobiga o‘tkaziladi.