Мадад ННТ ижрочи директори Ш. Саидов 2025 йил 29 сентябрь куни Коррупцияга қарши курашиш агентлиги раҳбари А. Бурхонов ва агентлик масъул ходимлари билан учрашув ўтказди. 

Учрашувда ташкилот томонидан амалга оширилаётган ишлар ҳақида ахборот берилди ва агентликнинг мамлакатимизда коррупция ҳолатини тизимли таҳлил қилиш, коррупция хавфлари юқори бўлган соҳаларни аниқлаш, коррупциянинг олдини олиш ва унга қарши курашишда халқаро ҳамкорликни ривожлантириш борасидаги саъй-ҳаракатлари юқори баҳоланиши билдирилди.

Агентлик фуқароларнинг ҳуқуқий онгини ошириш, жамиятда коррупциянинг барча кўринишларига муросасиз муносабатни шакллантириш, коррупция ҳолати, тенденциялари ва сабаблари бўйича социологик, илмий тадқиқотлар ташкил этиш орқали коррупцияга қарши чораларни аниқлашда самарадорликни таъминлашга интилаётганини таъкидлади. Мадад ННТнинг мақсадлари билан бу борадаги фаолиятлар ҳамоҳанг эканлиги қайд этилди. 

"Мадад" ННТ эксперт салоҳияти ва бой тажрибаси билан агентликнинг бу йўналишдаги фаолиятида яқиндан ҳамкорлик қилишга тайёрлигини билдирган ҳолда, қуйидаги йўналишларда биргаликда тадбирлар ташкил этиш таклифи билдирилди:

• жамиятда аҳолининг ҳуқуқий онги ва ҳуқуқий маданиятини оширишга кўмаклашиш;
• давлат органлари ва ташкилотлари устидан жамоатчилик назоратини олиб бориш жараёнида фаол қатнашиш;
• ижтимоий-иқтисодий масалалар юзасидан жойларда жамоатчилик фикрини ўрганиш юзасидан социологик сўровлар ўтказиш;
• қонун ижодкорлиги.

Ушбу учрашув икки томонлама ҳамкорликни янги босқичга олиб чиқиш, коррупцияга қарши курашда самарадорликни ошириш учун муҳим қадам бўлиб хизмат қилиши маълум қилинди.