Имтиҳонлар 10 кун давом этади ва икки сменада ташкил этилади. Абитуриентлар учун рухсатномалар тарқатилиши бугундан бошланди.

2025/2026 ўқув йили учун Ўзбекистондаги олий таълим муассасаларига кириш тест синовлари 14 июлдан 23 июлгача (шу куни ҳам қўшилган ҳолда) бўлиб ўтади, деб хабар бермоқда Билим ва малакаларни баҳолаш агентлиги.

Тест синовлари икки сменада ўтказилади: соат 08:00 ва 15:00 да. Абитуриентлар тест бошланишидан камида бир ярим соат олдин белгиланган жойда бўлишлари лозим.

Шунингдек, онлайн рўйхатдан ўтган абитуриентларга my.uzbmb.uz сайти орқали рухсатномаларни юклаб олиш ва чоп этиш имкони яратилди.

«Абитуриентларга ўз рухсатномаларини албатта юклаб олиш ва чоп этиш тавсия этилади. Улар тест синовларига фақат рухсатномада кўрсатилган бино, сана ва сменадагина киритилади. Бошқа жойда, бошқа куни ёки сменада тестда иштирок этиш тақиқланади», — дейилади агентлик хабарида.

Тест синовларига абитуриент фуқаролик паспорти (ID-картаси) ва рухсатнома билан келишлари шарт.

Паспорт нусхаси ёки бошқа ҳужжатлар билан келган, шунингдек тестга кечиккан абитуриентлар синовга киритилмайди.