O‘zbekistonda dorixonalardan retsept asosida beriladigan dori vositalarini chakana sotish tartibini buzganlik uchun javobgarlik kuchaytirildi.

Kodeksga kiritilgan o‘zgartishlarga ko‘ra, kuchli taʼsir qiluvchi moddalarni o‘z ichiga olgan dorilarni retsept asosida chakana sotish tartibini buzish endi 100 dan 200 BHMgacha miqdorda (41 mln 200 ming so‘mdan 82 mln 400 ming so‘mgacha) jarima solinishiga sabab bo‘ladi.

Avval ushbu huquqbuzarlik uchun 50 dan 100 BHMgacha jarima belgilangan edi.

Jinoyat kodeksiga kiritilgan o‘zgartishlarga ko‘ra, kuchli taʼsir qiluvchi moddalarni o‘z ichiga olgan dorilarni retsept asosida chakana sotish tartibini maʼmuriy jazo qo‘llanilgandan keyin takroran yoki yirik miqdorda buzish 200 dan 300 BHMgacha (123 mln 600 ming so‘mgacha) jarima, yoki 3 yilgacha axloq tuzatish ishlari, yoki 2 yildan 5 yilgacha ozodlikni cheklash, yoki 5 yilgacha ozodlikdan mahrum qilish bilan jazolanadi.

Bungacha esa jarimaning eng kam miqdori 100 BHMni tashkil etar edi.

Eslatib o‘tamiz, «Elektron retsept» DMED axborot tizimi o‘tgan yil dekabr oyida Toshkent shahrida hamda mamlakatning 15 ta shahar va tumanida joriy etilgan. Ushbu tizim farmatsevtika bozorida shaffoflikni oshirish, dorixonalar uchun teng shart-sharoit yaratish va kontrabanda hamda noqonuniy farmmahsulotlar aylanmasini aniqlash maqsadida ishlab chiqilgan.

Tizimni joriy etishning birinchi bosqichida retsept asosida faqat antibiotiklar va gormonal preparatlar beriladi.