Mobil ilovalarda onlayn firibgarlikka qarshi talablar kuchaytirildi

✅ Nizomga ko‘ra, mobil ilovada ro‘yxatdan o‘tgan foydalanuvchi akkauntiga faqat ushbu shaxs yoki yaqin qarindoshlariga tegishli bo‘lgan bank hisobvarag‘i, bank kartasi va elektron hamyonlarni biriktirishi hamda ushbu akkaunt orqali P2P o‘tkazmalarini amalga oshirishi mumkin.

❌ Foydalanuvchining telefon raqami va JSHSHIRi mos kelishi tekshiriladi hamda moslik aniqlanmaganda mobil ilovada ro‘yxatdan o‘tkazish va bank kartasini biriktirishga yo‘l qo‘yilmaydi.

Kredit va to‘lov tashkilotlari foydalanuvchilarni biometrik identifikatsiyadan o‘tkazishda hayotiylik faktorlarini aniqlashi shart, yaʼni rasm orqali identifikatsiya qilish mumkin bo‘lmaydi.

Telefonga yuborilgan 1 martalik SMS xabar 3 marotaba noto‘g‘ri kiritilganda, foydalanuvchining mobil ilovadagi harakatlari 15 daqiqa davomida vaqtincha cheklanadi;

▶️ Mobil ilovadagi akkauntga boshqa qurilmadan kirish yoki uning parolini qayta tiklashda ushbu akkauntga bog‘langan barcha bank kartalari mobil ilovadan avtomatik tarzda chiqarib yuboriladi.

Shuningdek, ushbu qurilmada bank kartalari bo‘yicha moliyaviy operatsiyalar tarixi o‘chirib yuboriladi. 

☑️ Bunda, bank kartalarini biriktirish biometrik identifikatsiyadan o‘tkazilgan holda amalga oshiriladi

Onlayn moliyaviy xizmatlar endi yana-da xavfsiz

Nizomga ko‘ra, kredit tashkilotlari mijozlar onlayn firibgarlik holatlari bo‘yicha zudlik bilan murojaat qilishi uchun bank kartasining orqa tomonida 24 soat ishlaydigan (24/7) aloqa raqamini joylashtiradi;

✅ Bank kartasi rasmiylashtirilganda yoki boshqa moliyaviy xizmatlar ko‘rsatilganda tuziladigan shartnomalar va ommaviy ofertalarda quyidagilar aniq belgilanishi shart:

♦ foydalanuvchiga firibgarlik belgilari aniqlanganligi to‘g‘risida maʼlumot berilishi; 

♦ foydalanuvchi qurilmasi yo‘qolganini yoki unga begona shaxslar tomonidan nazorat o‘rnatilganini bilgan zahoti, kechiktirmasdan, ammo 1 kundan kech bo‘lmagan muddatda bank yoki to‘lov tashkilotini xabardor qilishi;

♦ foydalanuvchi o‘z roziligisiz amalga oshirilgan operatsiyani aniqlaganidan so‘ng 1 kun ichida bu haqda kredit yoki to‘lov tashkilotiga maʼlum qilishi.

Foydalanuvchi SMS-xabarnoma xizmatiga ulangan telefon raqamini o‘zgartirgan taqdirda kredit va to‘lov tashkiloti uning avvalgi telefon raqamiga xizmatning o‘chirilganligi va yangi telefon raqamiga xizmatning ulanganligi haqida SMS-xabarnoma orqali xabar beradi.