Bugun, 20 yanvar kuni bo‘lib o‘tgan majlisda "Shaxsga doir maʼlumotlar to‘g‘risida"gi O‘zbekiston Respublikasi Qonuniga o‘zgartish va qo‘shimchalar kiritishni nazarda tutuvchi qonun loyihasi birinchi o‘qishda ko‘rib chiqildi.

Taʼkidlanganidek, O‘zbekistonda moliyaviy texnologiyalar sohasini rivojlantirish, naqd pulsiz hisob-kitoblar ulushini oshirish, shuningdek, sayyohlar oqimini ko‘paytirish va turistik xizmatlar ko‘lamini kengaytirishga qaratilgan izchil islohotlar amalga oshirilmoqda. Bu jarayonlar zamonaviy raqamli to‘lov tizimlarini joriy etish va xalqaro onlayn to‘lov kompaniyalari bilan hamkorlikni kengaytirishni taqozo etmoqda.

Qonun loyihasi bilan O‘zbekiston hududida majburiy tarzda saqlanishi lozim bo‘lgan shaxsga doir maʼlumotlar turlarini aniq belgilash, shuningdek, ayrim maʼlumotlarni chet elda qayta ishlash va saqlash uchun xavfsizlik, xalqaro standartlarga rioya etish va vakolatli organ talablarini bajarish kabi shartlarni joriy etish taklif etilmoqda.

Ushbu o‘zgartirishlar orqali xalqaro to‘lov tizimlarini mamlakatga jalb qilish, investitsiya muhitini yana-da yaxshilash, raqamli xizmatlar bozorini kengaytirish hamda fuqarolar va sayyohlar uchun zamonaviy to‘lov imkoniyatlarini yaratishga xizmat qiladi.

Qonun loyihasi deputatlar tomonidan qabul qilinib, Senatga yuborildi.

Eslatib o‘tamiz, 2025 yil noyabr oyida Shavkat Mirziyoyev AQSHga tashrifi doirasida AQSHning yetakchi kompaniyalari, investitsiya fondlari va moliya institutlari vakillari bilan uchrashuv o‘tkazgan edi.

AQSHning Google, Meta, NVIDIA kompaniyalari bilan raqamli hamkorlikni kengaytirish, xususan, Apple Pay va Google Pay to‘lov tizimlarini joriy etish imkoniyatlari ko‘rib chiqildi.