Bugun, 22 iyul kuni “Madad” nodavlat notijorat tashkiloti faoliyatida muhim voqea yuz berdi! Biz Yuridik kadrlarni qayta tayyorlash va malakasini oshirish instituti bilan o‘zaro hamkorlik memorandumini imzoladik!

Ushbu hamkorlikning asosiy yo‘nalishlari: “Madad” NNT tomonidan: Turli grantlar va ijtimoiy buyurtmalar doirasida amalga oshiriladigan huquqiy bilim va savodxonlikni oshirishga qaratilgan tadbirlarga Institutning yuqori malakali professor-o‘qituvchilari jalb qilib boriladi. Bu aholiga ko‘rsatilayotgan yuridik yordam sifatini yangi darajaga olib chiqadi! Institut tomonidan: “Madad” NNTning masʼul xodimlari uchun doimiy ravishda zamonaviy seminar-treninglar o‘tkazib boriladi. Bu esa yuristlarimizning bilim va ko‘nikmalarini muntazam yangilab borish, huquqiy amaliyotdagi eng so‘nggi o‘zgarishlardan xabardor bo‘lish imkonini beradi.

Bunday hamkorlik aholimizga, ayniqsa ijtimoiy himoyaga muhtoj va kam taʼminlangan, nogiron fuqarolarga bepul yuridik yordam ko‘rsatish sifatini yana-da oshiradi. Biz birgalikda yuridik savodxonlikni keng targ‘ib qilib, har bir fuqaroning adolatga erishish imkoniyatini kengaytiramiz! Ishonchimiz komilki, bu hamkorlik O‘zbekistonda huquqiy madaniyatni yuksaltirish va fuqarolarning huquqiy ongini oshirish yo‘lida yangi, muhim qadam bo‘ladi.