O‘zbekistonda ikkinchi mutaxassislikni egallash istagidagi talabgorlardan hujjatlar qabuli boshlandi. Qabul 10 avgust kuniga qadar davom etadi.

Oliy taʼlim, fan va innovatsiyalar vazirligi 2025/2026 o‘quv yili uchun ikkinchi mutaxassislikka qabul boshlanganini eʼlon qildi.

2025/2026 o‘quv yilida ikkinchi va undan keyingi taʼlim (ikkinchi mutaxassislik) uchun talabgorlarni onlayn ro‘yxatdan o‘tkazish Oliy taʼlim, fan va innovatsiyalar vazirligining Yagona taʼlim xizmatlari portali my.edu.uz orqali joriy yilning 10 avgust kuniga qadar onlayn shaklda amalga oshiriladi.

Bunda nomzodlar platformada:

• o‘zining pasport maʼlumotlari, JSHSHIR maʼlumoti haqida axborotlarni kiritadi;

• diplom va uning ilovasining elektron nusxasini yuklaydi;

• hamda o‘qish istagini bildirgan oliy taʼlim muassasasi va taʼlim yo‘nalishini tanlaydilar.

Ikkinchi va undan keyingi oliy maʼlumot bo‘yicha o‘qitish to‘lov-kontrakt asosida amalga oshiriladi.

Maʼlumot uchun, ikkinchi va undan keyingi oliy taʼlim bo‘yicha qabul parametrlari oliy taʼlim muassasasining ilmiy-pedagogik salohiyati va moddiy-texnik bazasi hisobga olingan holda oliy taʼlim muassasasi kengashi tomonidan belgilanadi.