Imtihonlar 10 kun davom etadi va ikki smenada tashkil etiladi. Abituriyentlar uchun ruxsatnomalar tarqatilishi bugundan boshlandi.

2025/2026 o‘quv yili uchun O‘zbekistondagi oliy taʼlim muassasalariga kirish test sinovlari 14 iyuldan 23 iyulgacha (shu kuni ham qo‘shilgan holda) bo‘lib o‘tadi, deb xabar bermoqda Bilim va malakalarni baholash agentligi.

Test sinovlari ikki smenada o‘tkaziladi: soat 08:00 va 15:00 da. Abituriyentlar test boshlanishidan kamida bir yarim soat oldin belgilangan joyda bo‘lishlari lozim.

Shuningdek, onlayn ro‘yxatdan o‘tgan abituriyentlarga my.uzbmb.uz sayti orqali ruxsatnomalarni yuklab olish va chop etish imkoni yaratildi.

«Abituriyentlarga o‘z ruxsatnomalarini albatta yuklab olish va chop etish tavsiya etiladi. Ular test sinovlariga faqat ruxsatnomada ko‘rsatilgan bino, sana va smenadagina kiritiladi. Boshqa joyda, boshqa kuni yoki smenada testda ishtirok etish taqiqlanadi», — deyiladi agentlik xabarida.

Test sinovlariga abituriyent fuqarolik pasporti (ID-kartasi) va ruxsatnoma bilan kelishlari shart.

Pasport nusxasi yoki boshqa hujjatlar bilan kelgan, shuningdek testga kechikkan abituriyentlar sinovga kiritilmaydi.