So‘nggi yillarda xalq deputatlari mahalliy Kengashlarining hududlarni ijtimoiy-iqtisodiy rivojlantirish va aholini ijtimoiy himoya qilishga oid vakolatlari kengaytirildi. Shu munosabat bilan mahalliy Kengashlarning vakolatlari, vazifalari va funktsiyalarini aniq tizimlashtirish, ularni monitoring qilish hamda yagona ochiq elektron axborot bazasini shakllantirish maqsadida maxsus reestrni yuritish tartibi belgilandi.

Reestr nima uchun yuritiladi?

Reestrni yuritishning asosiy maqsadi mahalliy davlat hokimiyati vakillik organlarining vazifa va funktsiyalarini tizimlashtirish, monitoring qilish va ular haqidagi ma’lumotlarni yagona ochiq elektron bazada jamlashdan iborat. Bu mahalliy Kengashlar faoliyatida aniqlik, shaffoflik va samaradorlikni ta’minlashga xizmat qiladi.

Reestrni qaysi organ yuritadi?

Reestrni shakllantirish va yuritish bo‘yicha vakolatli organ O‘zbekiston Respublikasi Oliy Majlisi Senati devoni hisoblanadi. Ushbu vazifa Senat devonida Hududiy vakillik organlari faoliyatini o‘rganish markazi tomonidan amalga oshiriladi. Reestr axborot-kommunikatsiya texnologiyalaridan foydalangan holda “E-kengash” elektron tizimi orqali yuritiladi.

Reestrdan kimlar foydalanadi?

Elektron tizimdan xalq deputatlari mahalliy Kengashlari deputatlari va mahalliy Kengashlar kotibiyatlari xodimlari elektron raqamli imzo yoki “One ID” orqali foydalanadi. Reestrdagi ma’lumotlar tanishib chiqish uchun ochiq hisoblanadi. Biroq davlat siri yoki qonun bilan muhofaza qilinadigan boshqa sirlarni tashkil etuvchi ma’lumotlar Reestrga kiritilmaydi. Reestr davlat tilida yuritiladi.

Reestrga qanday ma’lumotlar kiritiladi?

Reestrga mahalliy Kengashlar vakolatlariga oid ma’lumotlar turli sohalar kesimida kiritiladi. Jumladan, byudjet, moliya va soliq siyosati, hududiy dasturlarni tasdiqlash, mansabdor shaxslarning hisobotlarini eshitish, normativ tusdagi qarorlar qabul qilish, nazorat-tahlil faoliyati, er munosabatlari, ekologiya, ta’lim, sog‘liqni saqlash, ijtimoiy himoya, mehnat munosabatlari, kommunal xo‘jalik, xavfsizlik va huquq-tartibot sohalariga oid vakolatlar shular jumlasidandir.

Reestrda har bir vazifa yoki funktsiya bo‘yicha nima ko‘rsatiladi?

Har bir vazifa va funktsiya bo‘yicha uning qisqacha nomi, ushbu vazifa yoki funktsiyani belgilagan normativ-huquqiy hujjat nomi va rekvizitlari, shuningdek uni amalga oshirish yuklatilgan mahalliy Kengashning rasmiy nomi va darajasi Reestrda aks ettiriladi. Bu har bir vakolatning huquqiy asosini aniq ko‘rsatishga imkon beradi.

Ma’lumotlar Reestrga qanday kiritiladi?

Vazifa va funktsiyani belgilovchi normativ-huquqiy hujjat kuchga kirgan kundan boshlab 15 ish kuni ichida vakolatli organ axborot tizimida tegishli ma’lumotlarni shakllantiradi. Kiritilgan ma’lumotlar 3 ish kuni ichida to‘liqligi va haqqoniyligi bo‘yicha tekshiriladi. Agar ma’lumotlar to‘liq va to‘g‘ri bo‘lsa, ular tasdiqlanadi va axborot tizimida aks ettiriladi. Agar kamchiliklar aniqlansa, ular bartaraf etilib, ma’lumot qayta kiritiladi.

Ma’lumotlarga o‘zgartirishlar qanday kiritiladi?

Agar vazifa va funktsiyani belgilovchi normativ-huquqiy hujjatga o‘zgartirish yoki qo‘shimchalar kiritilsa, yoki u bekor qilinsa, Reestrga ham tegishli o‘zgartishlar kiritiladi. Bunda vakolatli organ o‘zgartirishning sanasi va mohiyatini qayd etadi. Agar vazifa yoki funktsiya bekor qilinsa, u Reestrdan butunlay o‘chirib tashlanmaydi, balki bekor qilingani haqida tegishli belgi qo‘yiladi.

Vakolatli organning huquq va majburiyatlari

Vakolatli organ mahalliy davlat hokimiyati vakillik organlarining vazifa va funktsiyalarini tahlil qilish, monitoring yuritish, takrorlanuvchi yoki ahamiyatini yo‘qotgan vazifalarni aniqlash hamda ularni bekor qilish bo‘yicha takliflar tayyorlash huquqiga ega. Shu bilan birga, u Reestrga ma’lumotlarni o‘z vaqtida va to‘g‘ri kiritilishini, ularning tekshirilishini va jismoniy hamda yuridik shaxslarning ushbu ma’lumotlardan foydalana olishini ta’minlashi shart.