Milliy gvardiyaga ishga kirishga qanday talablar bor?

Milliy gvardiyaga ishga kirishda O‘zbekiston Respublikasining umumiy o‘rta yoki o‘rta maxsus (boshlang‘ich, o‘rta, o‘rta maxsus professional) yoxud oliy ma’lumotga ega bo‘lgan quyidagi fuqarolari ishtirok etishlari mumkin:

— o‘n sakkiz yoshdan o‘ttiz yoshgacha bo‘lgan shaxslar;

—muqaddam kontrakt bo‘yicha harbiy xizmatni o‘tagan qirq yoshgacha bo‘lgan shaxslar;

— rezervdagi va zaxiradagi qirq yoshgacha bo‘lgan ofitserlar.

Bunda, erkak jinsidagi nomzod O‘zbekiston Respublikasi Qurolli Kuchlari safida muddatli harbiy xizmatni o‘tagan (o‘tayotgan) yoki safarbarlik chaqiruvi rezervida harbiy xizmatni o‘tagan yoxud oliy ta’lim tashkilotlari harbiy tayyorgarlik kurslarida o‘qishni tugatgan bo‘lishi, shuningdek harbiy ro‘yxatda turgan bo‘lishi kerak.

Nomzodning bo‘yiga qo‘yiladigan talablar qanday

Kontrakt bo‘yicha harbiy xizmatga qabul qilishda nomzod bo‘yining balandligi quyidagi maxsus antropometrik parametrlarga javob berishi talab etiladi:

— erkak jinsidagi nomzodning bo‘yi — 178 santimetrdan past bo‘lmasligi kerak;

— ayol jinsidagi nomzodning bo‘yi — 170 santimetrdan past bo‘lmasligi kerak.

Jismoniy tayorgarlik uchun qanday sport mashqlarini bajarish lozim?

Quyidagilar erkak jinsidagi nomzodlar tomonidan bajarilishi lozim bo‘lgan jismoniy tayyorgarlik mashqlari hisoblanadi:

— to‘sinda (turnikda) tortilish yoki tiralib yotgan holda qo‘lni bukish va rostlash;

— 100 metrga yugurish;

— 3000 yoki 1000 metrga yugurish.

Ayol jinsidagi nomzodlar tomonidan bajarilishi lozim bo‘lgan jismoniy tayyorgarlik mashqlari esa quyidagilar hisoblanadi:

— kuch ishlatish mashqlari kompleksi;

— 100 metrga yugurish;

— 1000 metrga yugurish.

Jismoniy tayyorgarlik mashqlarini uzrsiz sabablarga ko‘ra bajarmagan, shuningdek mashqlarni bajarishi «qoniqarsiz» baho bilan baholangan nomzodlarga jismoniy tayyorgarlik mashqlarini shu kunning o‘zida qayta topshirishga ruxsat berilmaydi.