Tug‘ilganlik, (nikoh tuzilganligi, nikohdan ajralganlik) haqidagi dalolatnoma yozuvlari bu yozuvlar kimga nisbatan tuzilgan bo‘lsa faqat ana shu shaxslarning arizasiga ko‘ra tiklanadi.

Agar o‘n olti yoshgacha bo‘lgan bolaning tug‘ilishi haqidagi yozuv yo‘qolgan bo‘lsa yozuv bolaning ota-onasi, vasiysi, homiysi, bolalar muassasasi ma’muriyatining arizasiga binoan tiklanadi.

Dalolatnoma yozuvini tiklash to‘g‘risidagi ariza olingan taqdirda FHDYo organi dalolatnoma yozuvini tiklash uchun asosligini tasdiqlovchi dalolatnoma yozuvlaridan nusxalarni, ular saqlanadigan joydagi tegishli FHDYo organlaridan “ FHDYo ning yagona elektron arxivi” axborot tizimi orqali so‘rab olishi mumkin.

Tug‘ilganlik haqidagi dalolatnoma yozuvini tiklash uchun qanday hujjatlar talab qilinadi?

Tug‘ilganlik haqidagi dalolatnoma yozuvini tiklash uchun FHDYo organiga quyidagi hujjatlar taqdim etiladi:

dalolatnoma yozuvini tiklash to‘g‘risida belgilangan namunadagi ariza;

hududiy adliya organi FHDYo arxivining ariza beruvchining tug‘ilgan joyi bo‘yicha dalolatnoma yozuvining yo‘qligi yoki yo‘qolganligi (yo‘qolganlik sabablarini ko‘rsatgan holda) haqidagi ma’lumotnomasi;

ariza beruvchining fuqarolik pasporti (identifikatsiyalovchi ID-kartasi) nusxasi;

ota-onasining fuqarolik pasporti (identifikatsiyalovchi ID-kartasi) nusxalari, agar ota-onasi vafot etgan bo‘lsa, ularning o‘limi haqidagi ma’lumotnomalar;

nikoh tuzilganligi haqidagi (ota-onasining va o‘zining) ma’lumotnomalar;

ota-onalarining hujjatlari bo‘lmaganda, aka-ukalari, opa-singillarining (ular bo‘lsa) tug‘ilganlik to‘g‘risidagi ma’lumotnomalari.

Tug‘ilganlik haqidagi dalolatnoma yozuvini tiklash uchun FHDYo organiga ariza beruvchining iltimosini asoslovchi boshqa hujjatlar ham taqdim etilishi mumkin.

Bunda ariza beruvchining iltimosini asoslovchi boshqa hujjatlar sifatida gerbli guvohnomalar yoki harbiy xizmatga aloqadorlikni tasdiqlovchi hujjatlar, ularning kseronusxasi (nusxasi), ariza beruvchining o‘qish yoki ish joyidan berilgan ma’lumotnoma, uy daftaridan olingan ko‘chirmalar, ichki ishlar organlarining ma’lumotnomasi, FHDYo organlari tomonidan shaxsni tasdiqlovchi hujjatlarga nikoh va nikohdan ajralish qayd etilganligi haqida belgi qo‘yilganligini tasdiqlovchi hujjatlar va boshqa shu kabi hujjatlar qabul qilinishi mumkin.

Tug‘ilganlik haqidagi dalolatnomani tiklash uchun to‘lov miqdori

O‘zbekiston Respublikasining “Davlat boji to‘g‘risida”gi Qonuniga muvofiq tug‘ilganlik haqida, nikohni qayd etganlik, nikohni bekor qilganlik to‘g‘risida, o‘lim haqidagi yozuvlar o‘zgartirilganligi, ularga qo‘shimchalar kiritilganligi, tuzatilganligi va qayta tiklanganligi munosabati bilan guvohnomalar berganlik uchun BHM (bazaviy hisoblash miqdori) ning 10 foizi miqdorida ya’ni 37 500 so‘m mablag‘ to‘lanishi belgilangan.